مممممممممممم بصراحه مش عارفه ابدأ منين
اصلى عاملت المدونه دى من حوالى سنتين ولما جيت أكتب فيها مالقتش فى حياتى حاجه مفيده او غير مفيده الواحد يكتبها
عموما اللى خلانى افكر انى أدور عليها وأكتب فيها هو انى بعد طبعا ما خلصت دراسه وزى بقية البشر قعدت على القهوه كالعادة وبعدين فكرت انى انزل اشتغل مع والدى لأنه ياولداه ماخلفش الا بنات وبس ومين اللى هيشيل تجارته من بعده و... و...و....
المهم حبيت اعمل فيها انى بنت بمية راجل وانى اقدر اساعد والدى فى شغله المهم نويت ووالدى بصراحه كان محتاج حد معاه يأتمنه وأهه منها يآخد باله من المحل فى الوقت اللى واالدى ميكونش موجود فيه ولما نزلت الشغل طبعا مالقتش اللى كان نفسى فيه والدى طبعا مدلعنى على الآخر ومسكنى الحسابات بس يدوب بآخد الفلوس أعدها وأراجع الحسابات وكده يعنى .
المهم واحده فى واحده بدأت اعرف الناس اللى بيجوا المحل بأستمرار *ملحوظه : المحل هو محل لبيع المواد الغذائية بالجمله* يعنى بالبلدى كده تاجر بقالة بالجمله
بدأت أعرف الناس اللى بيجوا بأستمرار ويوم بعد يوم بدأت أعرف الأسعار وبدأت أتجرأ وأقوم لما والدى مايكونش موجود انى أشوف الناس عايزين ايه ومن خلال معاملتى مع الناس أكتشفت نوع جديد من البشر مكنتش أعرفه او اتعاملت معاه قبل كده .
ناس مختلفه فى التفكير وطريقة الكلام وحتى طريقه معاملتهم مع الناس
ومن هنا بقى جاتلى فكرة انى أرجع ادور ع المدونه وأدون يومياتى مع الناس اللى بتعامل معاهم كل يوم وأنطبعاتى المختلفه عن كل شخصية بتعامل معاها
وأهه منها أعمل اى حاجه تانية مفيده تسلينى فى حياتى لحد مايجى المحروس ..... أحم أحم قصدى ابن الحلال ويخطفنى على الحصان الأحمر *وذلك نظرا لحبى الشديد الشديد يعنى للنادى الأهلى *
ومن هنا بقى هبدأ التدوين يعنى حاجه كده على قدى
ليست هناك تعليقات:
إرسال تعليق