مش عارفة ابدأ منين بعد ما الدنيا خدتني وبقيت أم لأجمل طفلين في الكون , زياد 3سنين و9 شهور , وأنس سنة وشهر

فكرت اني أدخل للمدونة وأدون عليها يومياتي مع الولاد وقررت اني أكون أم غير تقليدية في تربيتها لأولادها 

وربنا يعيني علي المهمة التقيلة دي لان فعلا التربية دي من أصبع المهام في الحياة , ده لو عايز تنشأ جيل واعي , 

مثقف , غير تقليدى في طريقة تفكيره , هكون معاكم في المدونة من أول النهارده الاحد 4\12\2016 وهحاول أكتشف 

نفسي من أول وجديد بعد ماحسيت ان عقلي خلاص الصدأ بدأ يتراكم عليه وده بسبب طريقة الحياة التقليدية اللي أنا

عايشاها

يااااااااااااااه بقالي اربع سنين مادخلتش ع المدونة بس معرفش ليه قعدت الفتره دي ما أكتبش ، حاجه بتقولي اني دائماً مشغولة وظروف الحياه صعبه وكمان مع مسئولية الزواج ووجود بيبي ده تقريباً اكبر حاجه شغلاني الفتره دي ، وحاجه تانية بتقولي اني لو عايزه أكتب فمفيش حاجه هتشغلني إني أدون يومياتي بعد الخطوبة والزواج وأهي حتي فرصه حلوه إني أكتب عن ابني حبيبي ، ومعني كده إن الهدف اللي معموله المدونه ده خلاص إتبخر وده بعد ما قعدت فترة اشتغل مع والدي
في محل البقالة

      يوم من ايام ربنا 
                                                                                                                النهارده صاحبتنا أم الخير جت المحل تشترى شوية حاجات أسمعوا بقى قالتلى ايه *أزيك يانورا خدى ياحبيبتى هاتيلى شوية الحاجات دى (مع العلم انى ماسميش نورا خاااااااااااااااااااالص)
المهم قالتلى هاتيلى شاى ليكتون وبامبز رقم 3  .
يانهار ياجدعان اللغه العربيه فى صعود مستمر
المهم قولتلها ياستى انا ماأسميش نورا  فقالتلى امال اسمك ايه فقولتلها اسمى سمر فقالتلى نورا ولا سمر اهى كلها اسامى ربنا ورجعت نادتنى بنورا يانهار ابيض ياجدعان الشعب المصرى أذكى شعب فى العالم كله .
يلا بقى الخيرة فيما أختاره الشعب نورا نورا هو يعنى الكلام عليه جمرك, بس أكيد لما ابقى رئيسة الوزراء فى يوم من الايام مش هتقدر تقول اسمى غلط يلا بقى هستحمل لحد ما ابقى رئيسة الوزراء.
وبعدها بقى جت أم الملامح المصرية  زى ما انا مسمياها , دى بقى تقدروا تقول عليها وش مصرى جميل
(سمراء البشرة نقية الملامح يطل من عينيها ذكاء شديد أنها حقا أبنه الفراعين )
انا بصراحه معرفش اسمها ايه بس هى فعلا وشها مصرى اوى وملامحها جميلة ونقيه لأقصى درجه بتيجى عادة يومين فى الاسبوع او تلاته من طريقة لبسها أعتقد انها فلاحه وده لانها دايما بتلبس طاقية مصنوعه من الخوص ومن سمار جلدها تعرفوا انها عادة بتشتغل من وقت للتانى فى زراعة الارض او حتى زوجها عنده ارض وهى بتساعده على حسب نظرتى الفلسفية الجامدة جدا للأمور
عموما هو اليوم ده كان زاخر بالناس المميزين
جالنا أبو وش كشر زى ما انا مسمياه وده لانه فعلا كشر كشر يعنى لأقصى درجة , وجه جميل ناصع البياض زى الصينى بعد غسيلة عيون عسلية واسعة  بس للأسف ياخسارة جمال على الفاضى تشوف تكشيرته اللى مابتروحش من على وشه نفسك تتسد عن الدنيا واللى فيها ياخسارة الحلو مابيكملش زى مابيقولوا . جه طبعا كلمنى من طرف مناخيره كالعادة بس على مين يامعلم ولا بيهمنى ,سألت والدى هو ليه قرفان من نفسه كده ضحك وقالى لا هى دى طبيعته هو كده دايما
وهذا ابرز ما جاء فى هذا اليوم وسوف نوافيكم بأبرز الأخبار قريبا

بداية البداية

مممممممممممم بصراحه مش عارفه ابدأ منين



اصلى عاملت المدونه دى من حوالى سنتين ولما جيت أكتب فيها مالقتش فى حياتى حاجه مفيده او غير مفيده الواحد يكتبها


عموما اللى خلانى افكر انى أدور عليها وأكتب فيها هو انى بعد طبعا ما خلصت دراسه وزى بقية البشر قعدت على القهوه كالعادة وبعدين فكرت انى انزل اشتغل مع والدى لأنه ياولداه ماخلفش الا بنات وبس ومين اللى هيشيل تجارته من بعده و... و...و....


المهم حبيت اعمل فيها انى بنت بمية راجل وانى اقدر اساعد والدى فى شغله المهم نويت ووالدى بصراحه كان محتاج حد معاه يأتمنه وأهه منها يآخد باله من المحل فى الوقت اللى واالدى ميكونش موجود فيه ولما نزلت الشغل طبعا مالقتش اللى كان نفسى فيه والدى طبعا مدلعنى على الآخر ومسكنى الحسابات بس يدوب بآخد الفلوس أعدها وأراجع الحسابات وكده يعنى .


المهم واحده فى واحده بدأت اعرف الناس اللى بيجوا المحل بأستمرار *ملحوظه : المحل هو محل لبيع المواد الغذائية بالجمله* يعنى بالبلدى كده تاجر بقالة بالجمله


بدأت أعرف الناس اللى بيجوا بأستمرار ويوم بعد يوم بدأت أعرف الأسعار وبدأت أتجرأ وأقوم لما والدى مايكونش موجود انى أشوف الناس عايزين ايه ومن خلال معاملتى مع الناس أكتشفت نوع جديد من البشر مكنتش أعرفه او اتعاملت معاه قبل كده .


ناس مختلفه فى التفكير وطريقة الكلام وحتى طريقه معاملتهم مع الناس


ومن هنا بقى جاتلى فكرة انى أرجع ادور ع المدونه وأدون يومياتى مع الناس اللى بتعامل معاهم كل يوم وأنطبعاتى المختلفه عن كل شخصية بتعامل معاها


وأهه منها أعمل اى حاجه تانية مفيده تسلينى فى حياتى لحد مايجى المحروس ..... أحم أحم قصدى ابن الحلال ويخطفنى على الحصان الأحمر *وذلك نظرا لحبى الشديد الشديد يعنى للنادى الأهلى *


ومن هنا بقى هبدأ التدوين يعنى حاجه كده على قدى